“Qarabağ” ordenli şəhid Məhəmməd Əmənovun ailəsi ziyarət olunub

Bu gün Vətən müharibəsi şəhidi, tank komandiri olan Məhəmməd Əmənovun şəhadətinin ikinci anım günüdür.

"Bilesuvarinfo" xəbər verir ki, anım günündə şəhidimizin ailəsi və məzarı ziyarət olunub. Ziyarətdə rayon rəsmiləri və ictimaiyyətinin nümayəndələri, şəhidin silahdaşları iştirak edib.
Xalq öz qəhrəmanlarını unutmur, anım günündə Vətən, torpaq uğrunda canını fəda edən oğullarını böyük ehtiramla anır. Şəhadətinin ildönümündə Məhəmmədin ailəsini ziyarətə gələnlər arasında, Vətən müharibəsi iştirakçısı ehtiyatda olan polkovnik - leytenant Şaiq Şiriyev deyir ki, cəbhədən hər gün gələn Qələbə xəbərlərində tankçı gizir Əmənovun və heyətinin misilsiz xidmətləri olub. O, vətənini sevən əsil qəhrəman idi. Döyüşlərin 24-cü günündə Ağdərə istiqamətində düşmənin pusqusuna düşən silah yoldaşlarını xilas edərkən Məhəmməd şəhidlik zirvəsinə yüksəlir. Vətənə qəhrəman oğul böyüdən Nüşabə ana Məhəmmədlə bağlı qürürverici xatirələri yada salır. Deyir ki, xidmət göstərdiyi bütün illərdə Məhəmməd nümunəvilər sırasında olub, anacaq torpaqların işğalda qalması onu heç vaxt rahat buraxmırdı.. .

Qeyd edək ki, şəhid Məhəmməd İltizam oğlu Əmənov 1996-cı ildə Biləsuvarın Bağbanlar kəndində anadan olub. Orta məktəb illərindən Vətən təəssübü ilə böyüyən gənc Məhəmməd həqiqi hərbi xidmət dövründə hərb sirlərinə peşəkarcasına yiyələnir. Hərbi xidmətini başa vursa o, Gizirlik məktəbində “Tank komandiri” ixtisası üzrə kursları uğurla bitirərək, Goranboy rayonundan xidmətini davam etdirməyə başlayır. Gizir Məhəmməd Əmənov hələ 2016-cı ilin Aprel döyüşlərində əks hücum əməliyyatlarında düşmənə layiqli cavab verən tank komandirlərindən olmuşdu. Mərdliyi, qorxmazlığı ilə komandirlərin diqqətini çəkən Məhəmməd növbəti belə bir şansı 2020-ci il sentyabrın 27-də Vətən müharibəsində yenidən qazanır. O, Goranboy, Tərtər istiqamətlərindən tankı ilə düşmən üzərinə yeriyir.

Vətən müharibəsində Suqovuşanadək keçdiyi şərəf dolu rəşadətli döyüş yolu ona ölümündən sonra da alqış və başucalığı gətirdi. Ali Baş komandanın sərəncamı ilə tank komandiri, gizir Məhəmməd İltizam oğlu Əmənov ölümündən sonra “Vətən uğrunda”, “Suqovuşanın azad olunmasına görə”, “Cəsur döyüşçü medalları və “Qarabağ” ordeni ilə təltif olunub.