YAP Biləsuvar rayon təşkilatı ilin yekunları ilə bağlı iclas keçirib

"BİLESUVARİNFO.AZ" xəbər verir ki, tədbiri giriş sözü ilə açan YAP Biləsuvar rayon təşkilatının sədri Kamil Qurbanlı çıxışında bildirib ki, Yeni Azərbaycan Partiyası fəaliyyətinin ilk günlərindən etibarən bütün xalqın partiyası olub və bu gün də monolit birliyə, geniş sosial bazaya və güclü sosial bazası olan hakim siyasi təşkilat kimi fəaliyyətini davam etdirir. Bildirilib ki, Möhtərəm Prezidentimiz cənab İlham Əliyevin rəhbərliyi altında Yeni Azərbaycan Partiyasının sıralarının gündən-günə genişlənməsi cəmiyyətin dövlət başçısına və partiyaya olan dərin inamının bariz göstəricisidir. Rayon təşkilatının sədri “Konstitusiya və Suverenlik İli” çərçivəsində həyata keçirilən tədbirlərin əhəmiyyətinə toxunaraq, müstəqil Azərbaycanın hüquqi əsaslarının formalaşmasında Ulu Öndər Heydər Əliyevin müstəsna xidmətlərini qeyd edib, dövlət suverenliyimizin möhkəmləndirilməsinin Prezident İlham Əliyevin rəhbərliyi ilə uğurla davam etdirildiyini diqqətə çatdırıb. 

Tədbirdə çıxış edən YAP Mərkəzi Aparatının məsul əməkdaşı Əli Axundov bildirib ki, Ulu Öndər Heydər Əliyevin müəyyən etdiyi siyasi xətt bu gün onun layiqli davamçısı, Yeni Azərbaycan Partiyasının Sədri, Azərbaycan Respublikasının Prezidenti cənab İlham Əliyev tərəfindən uğurla davam etdirilir və bu xətt partiyanın fəaliyyətinin daha sistemli və məqsədyönlü qurulmasını tələb edir. Əli Axundov partiyanın müasir dövrdə qarşısında duran vəzifələrdən, təşkilati strukturun gücləndirilməsindən və ərazi partiya təşkilatlarının fəaliyyətinin daha da təkmilləşdirilməsinin əhəmiyyətindən danışıb. O, partiya üzvləri ilə işin düzgün və sistemli şəkildə qurulmasının, ideoloji xəttin ardıcıl təbliğinin və yerlərdə təşəbbüskarlığın artırılmasının vacibliyini vurğulayıb. Bildirib ki, partiyanın sosial şəbəkələrdə fəaliyyəti müasir informasiya mühitinin tələblərinə uyğun olaraq sistemli, məqsədyönlü və koordinasiyalı şəkildə təşkil edilməli, bu sahədə vahid yanaşma təmin olunmalıdır. Əli Axundov yerli təşkilatların informasiya fəaliyyətində fəallığının artırılmasının partiyanın ictimai nüfuzunun möhkəmləndirilməsinə xidmət etdiyini qeyd edərək, ərazi partiya təşkilatlarına müvafiq tövsiyələr verib.