Biləsuvar Peşə liseyində “Sən də peşəyə gəl, peşənin peşəkarı ol!” adlı tədbir keçirilib. Tədbirin məqsədi peşə təhsilinin əhəmiyyətini, gəncləri müxtəlif peşələrlə tanış etmək və peşə təhsili müəssisələrinin imkanlarını nümayiş etdirmək olub. Rayon ziyalılarının, ümumtəhsil məktəblərinin rəhbərləri və şagirdlərin iştirak etdiyi “Açıq qapı” günündə təşkil olunan geniş sərgidə şağirdlərin müxtəlif peşə sahələri üzrə 100-ə yaxın əl işləri nümayiş olunub“Bilesuvarinfo.az” xəbər verir ki, mərasimdə liseyin direktoru Nərmin Muradlı çıxış edərək bildirdi ki, bu sahədə peşəkar tədris prosesinin qurulması, əmək bazarının, eləcə də işəgötürənlərin təlabatlarına uyğun ixtisaslar üzrə kadr hazırlığının təmin olunması əsas vəzifələrdəndir: “İlk peşə ixtisas müəssisələrindən olan Biləsuvar Peşə liseyində də bu ənənə - bazar iqtisadiyyatının tələbinə uyğun peşələr üzrə kadr hazırlığı işi uğurla həyata keçirilir. Bu ilin yanvarından fəaliyyətini Publik Hüquqi Şəxs statusu ilə davam etdirən Biləsuvar Peşə liseyində hazırda 10 peşə ixtisası üzrə 16 qrupda 300-dən çox məktəbli təhsil alır. Növbəti ildən işəgötürənlərin tələbatlarına uyğun yeni ixtisasların sayının 18-ə çatdırılması planlaşdırılır. Liseydə yeni tədbiq olunan Dual peşə təhsilinin tədbiqi tələbələrimizə əmək bazarında təcrübə qazanmaq üçün müəssisələrdə praktika keçmələrinə imkan verir.”.
Tədbirdə Biləsuvar Rayon İcra Hakimiyyəti Başcısının müavini Azər Cəfərov çıxışında peşə təhsilinin müasir peşə təhsilinin əhəmiyyətindən söz açarkən qeyd etdi ki, elm və texnologiyanın sürətli inkişafı sənaye müəssisələrində yüksək ixtisaslı kadr ehtiyacına tələbatı artırır: “Əmək bazarının bu ehtiyacı peşə təhsilinin inkişafını hər gün daha da zəruri edir. Peşə təhsilinin əsas məqsədlərindən biri sənaye müəssisələrinin ehtiyac duyduğu işçi qüvvəsinin qısa zamanda təcrübə mühitində hazırlanmasıdır. Məhz bu baxımdan Biləsuvar Peşə Liseyi tərəfindən rayonda müəssisələrin kadr təlabatının ödənilməsində həyata keçirilən tədbirlər əhəmiyyətlidr.. .”.
Yeni Azərbaycan Partiyası Biləsuvar rayon təşkilatının sədri Kamil Qurbanlı çıxışında ölkə iqtisadiyyatının inkişafında görülən işlərin əhəmiyyətinə toxunarkən qeyd etdi ki, prezident İlham Əliyevin məqsədyönlü, konkret hədəflərə istiqamətlənmiş fəaliyyəti ölkənin siyasi və sosial-iqtisadi həyatı ilə bağlı problemlərin həllinə kompleks yanaşmanı təmin etmiş, qarşıya qoyulan vəzifələri yerinə yetirmək üçün ən səmərəli üsul və vasitələrin seçilməsinə imkan vermişdir: “Regionların sosial-iqtisadi inkişafına dair Dövlət proqramları çərçivəsində gerçəkləşdirilən tədbirlərin əsas məqsədlərindən biri ölkənin uzunmüddətli iqtisadi və sosial inkişafını təmin etmək olub. Bu baxımdan bölgələrdə də özəl sektorun inkişafı məqsədilə dövlətin müəyyənləşdirdiyi prioritetlər içərisində sahibkarlar üçün məsləhət xidməti, informasiya təminatı, marketinq xidməti və digər strukturların yaradılmasının davam etdirilməsi, sahibkarlıq fəaliyyətinə müdaxilələrin qarşısının alınması mühüm əhəmiyyət daşıyır”.
K.Qurbanlı Peşə təhsilinin əmək bazarının tələblərinə uyğun kadrlar yetişdirmək və iqtisadiyyatda davamlı inkişafı təmin etmək baxımından böyük əhəmiyyət kəsb etdiyini vurğulayaraq, bu yolda Biləsuvar Peşə liseyinin kollektivinə davamlı uğurlu fəaliyyət arzuladı.
Tədbirdə Biləsuvar şəhər 4 saylı orta məktəbin direktoru Elşən Ağazadə peşə təhsilin önəmindən, rəhbərlik etdiyi məktəbdə peşə dərnəklərinin uğurlu fəaliyyətindən danışdı. Daha sonra qonaqlar lisyin şagirdlərinin hazırladıqları əl işləri ilə yaxından tanış oldular.
Qələmə aldı: Surxay Şahbazov
