Özbəkistan Prezidenti Şavkat Mirziyoyevin Azərbaycana rəsmi səfəri mühüm tarixi hadisə kimi yadda qaldı. Bu səfər çərçivəsində Azərbaycan Prezidenti İlham Əliyev və Özbəkistan Prezidenti mətbuata birgə bəyanatla çıxış etdilər. Hər iki liderin verdiyi mesajlar, qarşılıqlı dostluğun, etimadın və əməkdaşlığın nə qədər möhkəm təməllər üzərində qurulduğunu bir daha sübut etdi. Prezident İlham Əliyev bəyanatında Özbəkistan liderinin Azərbaycana etdiyi bu vacib səfəri yüksək qiymətləndirdi. O, görüşü “dostluq və qardaşlıq ruhunda keçən məhsuldar bir dialoq” kimi səciyyələndirdi. Görüş zamanı iki ölkə arasında strateji və müttəfiqlik səviyyəsində əməkdaşlığın dərinləşməsi xüsusi diqqət mərkəzində idi.2024-cü ildə Təşkentdə imzalanmış Müttəfiqlik haqqında Bəyannamə artıq real nəticələr verir. Bu müqavilə Azərbaycan-Özbəkistan münasibətlərini rəsmi şəkildə strateji müttəfiqlik səviyyəsinə çatdırdı. Prezident Əliyev vurğuladı ki, bu sənəd kağız üzərində qalmayıb, konkret addımlarla dəstəklənir. İki ölkə arasında ticarət dövriyyəsi artır, energetika, nəqliyyat, sənaye və kənd təsərrüfatı sahələrində geniş əməkdaşlıq qurulur. Eyni zamanda, humanitar və mədəni sahələrdə də mühüm layihələr həyata keçirilir. Prezident İlham Əliyev çıxışında Özbəkistanın son illərdəki inkişafını yüksək qiymətləndirdi. O, Prezident Mirziyoyevin rəhbərliyi ilə ölkədə aparılan islahatların və iqtisadi yüksəlişin nümunəvi olduğunu qeyd etdi.
Görüş zamanı idman sahəsində də təbriklər səsləndi. İlham Əliyev Özbəkistan futbol yığmasının dünya çempionatının seçmə mərhələsinə vəsiqə qazanmasını böyük uğur adlandırdı. Bu, dostluq münasibətlərinin təkcə siyasi deyil, eyni zamanda ictimai və idman sahələrinə də sirayət etdiyini göstərir. Səfər çərçivəsində bir sıra mühüm hadisələr də baş verdi. Bakıda Özbəkistan səfirliyinin yeni binası açıldı. Eləcə də, “Özbəkistan” adlı yeni parkın təməlatma mərasimi keçirildi. Bu addımlar ölkələrarası mədəni əlaqələrin rəmzi kimi xüsusi məna daşıyır.
Prezidentlər Azərbaycan-Özbəkistan münasibətlərinin regional və beynəlxalq əməkdaşlıqda mühüm rol oynadığını vurğuladılar. Zəngəzur dəhlizi, Orta Dəhliz və digər nəqliyyat layihələrində tərəfdaşlıq ön plana çıxır. Prezident Əliyev bildirib ki, tranzit və logistika sahəsində ölkələrimizin maraqları üst-üstə düşür. Bu isə daha sıx iqtisadi bağlara və qarşılıqlı investisiya imkanlarına yol açır. Özbəkistanın Qarabağ bölgəsində — xüsusilə Füzuli rayonunda məktəb tikintisi ilə bağlı təşəbbüsü də humanitar sahədə əməkdaşlığın bariz nümunəsidir. Bu həm də Özbəkistanın Azərbaycanın ərazi bütövlüyünə dəstəyinin göstəricisidir. Prezident İlham Əliyev bu addımı yüksək dəyərləndirərək təşəkkürünü bildirdi.
Görüş zamanı regional təhlükəsizlik məsələləri də diqqət mərkəzində idi. Azərbaycan və Özbəkistan beynəlxalq platformalarda bir-birini dəstəkləməkdə davam edəcəklər. Bu, BMT, Türk Dövlətləri Təşkilatı, İƏT kimi təşkilatlarda da özünü göstərəcək. Dövlət başçıları həmçinin gənclər siyasəti, təhsil və elm sahəsində əməkdaşlığın genişləndirilməsi üçün razılaşdılar. Elmi-tədqiqat mərkəzlərinin və universitetlərin əməkdaşlığı qarşıdakı dövrdə prioritet istiqamətlərdən biri olacaq. Prezident İlham Əliyev çıxışında qeyd etdi ki, Özbəkistanla münasibətlər yalnız bu günə deyil, uzunmüddətli gələcəyə hesablanıb. Bu, qarşılıqlı hörmət, tarixi ortaq köklər və möhkəm dostluq üzərində qurulmuş münasibətlərdir.
Azərbaycan və Özbəkistan xalqları əsrlər boyu ortaq dəyərləri bölüşüblər. İndi isə bu dəyərlər üzərində strateji əməkdaşlıq inşa olunur. Prezidentlər arasında olan qarşılıqlı etimad, dövlətlərarası əlaqələrin inkişafına güclü təkan verir. Hər iki lider öz xalqları üçün rifah, sabitlik və tərəqqi axtarışındadır. Onların vizyonu bölgədə sülhün və əməkdaşlığın möhkəmlənməsinə xidmət edir. 2 iyul 2025-ci il tarixli görüş isə bu yolda atılmış mühüm addımlardan biri kimi tarixə düşəcək. Bu səfər və bəyanatlar Azərbaycan-Özbəkistan münasibətlərinin parlaq gələcəyinin göstəricisidir. Hər iki xalq bu dostluqdan qürur duyur və onun möhkəmlənməsində maraqlıdır. Prezident İlham Əliyevin çıxışı isə bu münasibətlərin strateji mahiyyətini dolğun şəkildə əks etdirdi.
Şənay Hüseynli,
mədəniiyyət işcisi
