Biləsuvar rayonu Təhsil veteranları qrupunun müəllimlərinin görüşü olub. Təhsil fədailərimizin növbəti görüşü Xanımgül və Fərman müəllimlərin ad günləri ərəfəsinə təsadüf edib.“Bilesuvarinfo” xəbər verir ki, veteran müəllimlər ilk olaraq Heydər Əliyev parkında olaraq, Ulu Öndərin abidəsini ziyarət etdilər.
Çay süfrəsi arxasında davam edən maraqlı görüşdə müəllimlərimiz yeni yaşa qədəm həmkarlarının gənc nəslin təlim-tərbiyəsində göstərdikləri gərgin, şərəfli xidmətlərindən söz açıb, onlara xoş arzularını çatdırıb.
YAP Biləsuvar rayon təşkilatının sədri Kamil Qurbanlı görüş iştirakçılarını ziyarət edərək, fədakar müəllimlərlə bir arada olmaqdan qürur hissi keçirdiyini söylədi. O, özünün də təhsil aldığı Biləsuvar şəhər 1 saylı tam orta məktəbin direktoru Xanımgül Abıyevanın təhsildə zəhmətlə dolu həyat hekayəsinə nəzər salıb, müəllimini doğum günü münasibətilə təbrik edib. “Zəngin tarixi keçmişə malik Biləsuvar İnternat tipli məktəb - liseyə Fərman Kərimovun uzun illər rəhbərlik etməsi təhsil ocağının uğurları ilə yadda qalıb. O, təhsil ocağında tərbiyə alan gənclərin Azərbaycan cəmiyyətinə layiqli şəxsiyyətlər kimi yetişməsində məxsusi xidmətlər göstərib. Bu gün qürürla deyə bilərik ki, Şuşa fatehimiz Hikmət Mirzəyev məhz Fərman müəllimin yetirməsidir…”- deyə, Kamil müəllim sözlərinə əlavə edib.
Görüşdə veteran müəllimlərimiz gənc nəsilin təlim- tərbiyəsində daha yaxından iştirak etməyin yollarını müzakirə edib. Görüşün təşkilatçısı Fəday Əliyev növbəti görüşlərin daha geniş tərkibdə və məhsuldar təşkili üçün öz təkliflərini irəli sürüb.
Qələmə aldı: SURXAY Şahbazov
