Müəllim ömrü neçə-neçə insanın həyat yolu ilə kəsişən bir ömürdür. Bir müəllim olaraq bu gün həmin anları xatırladıqda qürur və sevinc hissləri məni tərk etmir. Bağban min bir zəhmətlə yetişdirdiyi ağacın bəhrəsini görəndə sevindiyi kimi, biz müəllimlər də öz yetirmələrinin xoş sorağını alanda ürəyi sevincdən dağa dönür. Rayonumuzun zəngin tarixi keçmişli İsmətli kənd tam orta məktəbinin ötən illər ərzində minlərlə məzunu olub. Adlı-sanlı yetirmələrinin səsi-sorağı nəinki respublikamızın müxtəlif bölgələrindən, həmçinin dünyanın bəzi ölkələrindən gəlməkdədir. Onlardan biri Azərbaycan Dillər Univeristetinin İngilis dilinin leksikologiyası kafedrasının müdiri, professor Fikrət Cahangirovdur. O, respublikanın tanınmış dilçi alimlərindən biri olaraq özünün zəngin elmi-pedaqoji fəaliyyəti ilə dilçilik elminin inkişafına müstəsna töhfələr vermiş görkəmli şəxsiyyətlərdəndir.
Fikrət Fətiş oğlu Cahangirov 1971-ci ildə Biləsuvar rayonunun İsmətli kəndində anadan olub. 1988-ci ildə İsmətli kənd orta məktəbini əla qiymətlərlə bitirərək hərbi xidmətdə olub. 1992-ci ildə Azərbaycan Dövlət Dillər İnstitutunun İngilis-fransız dilləri fakültəsinə qəbul olub və 1997-ci ildə həmin fakültəni fərqlənmə diplomu ilə bitirərək Elmi şuranın qərarı ilə Universitetdə saxlanılıb. Həmin ildən o, ADU-nun İngilis dilinin leksikası və ölkəşünaslıq kafedrasında müəllim, baş müəllim, dosent və professoru vəzifələrindək yüksəlib.
2000-ci ildə «İngilis dilində perfekt zamanlar sistemi və onun Azərbaycan dilində ifadəsi» mövzusunda namizədlik, 2006-cı ildə isə «İngilis və Azərbaycan dillərində modallığın struktur-semantik tədqiqi» mövzusunda iki ixtisas- “5704.01- Dil nəzəriyyəsi” və “5708.01- German dilləri” ixtisasları üzrə doktorluq dissertasiyasılarını uğurla müdafiə edib. Bu tədqiqat işlərinə görə Azərbaycan Respublikası Prezidenti yanında Ali Attestasiyası Komissiyası ona 2001-ci ildə fəlsəfə doktoru, 2007-ci ildə filologiya elmləri doktoru alimlik dərəcələri, 2005-ci ildə dosent, 2014-cü ildə professor elmi adlarını verib.
Məktəbimizin mərhun direktoru Alış İbayevlə Fikrət müəllimin doktorluq dissertasiyasının müdafiəsində iştirakımızı yaxşı xatırlayıram. Bu zaman dilçi alim Ağamusa Axundovun Fikrət müəllim haqqında yüksək müsbət fikirlərini bu gün də qürur hissi ilə xatılayıram.
F.Cahangirov 2007-ci ilin 08 mayında sözügedən universitetin Roman-german filologiyası fakültəsinin dekanı vəzifəsinə seçilib və 2013-cü ilin fevralına kimi həmin vəzifədə işləyıb. Elə həmin ildən də Azərbaycan Respublikası Prezidenti yanında Ali Attestasya Komissiyasının Filologiya elmləri üzrə Ekspert Şurasının üzvü, 2016-2019-cı illərdə sədr müavini, 2020-2021-ci illərdə sədri olub. 2013-2014-cü illərdə ADU-da İngilis dilinin üslubiyyatı kafedrasının müdiri, 2014-cü ildən 2024-cü ilə kimi isə Təhsil fakültəsinin dekanı vəzifələrində çalışıb.
Hal-hazırda İngilis dilinin leksikologiyası kafedrasının müdiri olan F.Cahangirov elmi kadrların yetişdirilməsi istiqamətində də səmərəli işlər görüb. Belə ki, onun elmi rəhbərliyi altında 20 nəfər doktorant artıq fəlsəfə doktoru elmi dərəcəsini alıb. ADU-da fəaliyyət göstərən doktorluq Dissertasiya Şurasının və eləcə də “Elmi Xəbərlər”,“Azərbaycanda xarici dillər” jurnallarının Redaksiya Şuralarının üzvüdür.
Onun german dilləri, dil nəzəriyyəsi, ingilis və Azərbaycan dillərində modallığın struktur və semantik aspektdən tədqiqi, koqnitiv dilçilik, diskurs təhlili və linqvokulturologiya problemləri kimi aktual mövzularda nəşr etdirdiyi elmi əsərlər xarici ölkə alimləri tərəfindən də qəbul edilmiş və yüksək dəyərləndirilmişdir. Alimin əsərləri dünyanın bir çox ölkəsində vaxtaşırı nəşr olunub. Altı monoqrafiyanın, iki dərsliyin, üç fənn proqramının, iki metodik vəsaitin və 100-ə qədər elmi məqalənin müəllifidir, əsərləri ABŞ, Almaniya, İngiltərə, Rusiya və İranda nəşr olunub.
Elinə, vətəninə, doğma xalqına qırılmaz tellərlə bağlı olan hörmətli professor yüksək mənəviyyat, nümunəvi əxlaq sahibi, bütün varlığlı ilə dövlətçiliyimizə sədaqətlidir. Hakim partiya olan YAP-ın üzvü kimi, Partiyanın sədri, hörmətli Prezidentimiz cənab İlham Əliyevin yürütdüyü daxili və xarici siyasətin tələbə gənclər arasında izahı və təbliği istiqamətində səmərəli işlər görür. Təsadüfi deyildir k, Azərbaycan Respublikasının Prezidenti cənab İlham Əliyevin bir çox seçki kampaniyalarında təbliğatçı olmuşdur.
Səmərəli elmi və pedaqoji fəaliyyətinə görə yuxarı dövlət orqanların və universitet rəhbərliyinin müxtəlif mükafatlarına layiq görülən Fikrət müəllim bir neçə gündən sonra – 01 apreldə ömrünün 54-ci baharına qədəm qoyur. Onu ürəkdən təbrik edir, halallıqla, zəhmətlə ucaldığı zirvədə davamlı uğular, möhkəm can sağlığı və xoşbəxtlik arzu edirik.
Fəday Əliyev,
İsmətli kənd tam orta məktəbinin təqaüddə olan müəllimi
