Biləsuvarda “Təhlükəsiz şəhər” layihəsi çərçivəsində yol təhlükəsizliyi gücləndirilir

Biləsuvar rayonunda Daxili İşlər Nazirliyinin “Təhlükəsiz şəhər” layihəsi çərçivəsində yol hərəkəti təhlükəsizliyinin artırılması və nəzarət sistemlərinin müasirləşdirilməsi istiqamətində genişmiqyaslı işlər uğurla davam etdirilir.

“Bilesuvarinfo” xəbər verir ki, layihə çərçivəsində rayonun şəhər mərkəzi ilə yanaşı, bütün yaşayış məntəqələrində, 80 müxtəlif nöqtədə ümumilikdə 176 ədəd yüksək texnologiyalı müşahidə kamerasının quraşdırılması yekunlaşdırılmaq üzrədir.

Kameralar avtomatik rejimdə fəaliyyət göstərəcək və qayda pozuntularını operativ və şəffaf şəkildə qeydə almağa imkan verəcək. Bu, sürücülərin məsuliyyət hissinin artmasına və ümumi yol hərəkəti təhlükəsizliyinin yüksəldilməsinə xidmət edəcək. Layihə çərçivəsində, həmçinin rayonun intensiv hərəkətli və qəza riski yüksək olan ərazilərində 12 ədəd radar cihazının quraşdırılması da nəzərdə tutulur. Bu texnoloji vasitələr sürücü intizamının gücləndirilməsinə və yol-nəqliyyat hadisələrinin qarşısının alınmasına xidmət edəcək.

Bununla yanaşı, Azərbaycan Yerüstü Nəqliyyat Agentliyi (AYNA) tərəfindən Biləsuvar şəhərində avtonəqliyyat vasitələrinin hərəkətinin tənzimlənməsi məqsədilə yol cizgi xətləri və piyada keçidlərinin yenidən rənglənməsi işlərinə start verilib.

Artıq Heydər Əliyev prospektində bu işlər başa çatdırılıb və bu gündən etibarən Mübariz İbrahimov küçəsində davam etdirilir. Peşəkar səviyyədə həyata keçirilən bu işlər avtomobillərin təhlükəsiz hərəkəti və piyadaların rahat gediş-gəlişi üçün mühüm şərait yaradır.

Qeyd edək ki, bu tədbirlər Biləsuvar rayonunda yol hərəkəti iştirakçılarının təhlükəsizliyini təmin etməklə yanaşı, ictimai asayişin qorunmasında da mühüm rol oynayacaq.