Biləsuvar, 07 Noyabr, "BILESUVARINFO"
"Yaşıl dünya naminə həmrəylik ili" və 8 noyabr Zəfər Günü ilə əlaqədar Biləsuvar Dövlət Aqrar İnkişaf Mərkəzi tərəfindən ağacəkmə aksiyası keçirildi.
Biləsuvar DAİM tərəfindən "BILESUVARINFO"-ya bildirilib ki, Biləsuvar Dövlət Aqrar İnkişaf Mərkəzinin direktoru Nurəddin Quliyev, mərkəzin kollektivi və Azərbaycan Respublikası Kənd Təsərrüfatı Nazirliyinin yerli qurumlarının əməkdaşları iştirak etdiyi aksiya Biləsuvar-Astara yolunun sol hissəsində Biləsuvar DAİM-in qarşısında yerləşən boş ərazidə təşkil olunub.
Aksiya ətraf mühitin və ekoloji tarazlığın qorunmasına, yaşıllıqların artırılmasına dəstək verilməsi, eləcə də vətəndaşlar arasında ekoloji mədəniyyətin, təbiətə qayğı hissinin təbliğ edilməsi məqsədi daşıyıb.
Ağacəkmə aksiyasında 50-dən çox yerli iqlim şəraitinə uyğun olan ağaclar əkilib, onlara müvafiq aqrotexniki qulluq göstərilmişdir.
Qeyd edək ki, Biləsuvar Dövlət Aqrar İnkişaf Mərkəzi tərəfindən ağacəkmə aksiyaları mütəmadi olaraq təşkil edilir.
