Bu gün Vətən Müharibəsi şəhidləri - Alim Yoldaşov və İsmayıl Qədirlinin şəhadətinin ikinci ildönümü qeyd olunub. "Bilesuvarinfo" xəbər verir ki, şəhidlərimizin anım mərasimlərində Biləsuvar Rayon İcra Hakimiyyəti başçısının birinci müavini Azər Cəfərli, YAP Biləsuvar rayon təşkilatının sədri Kamil Qurbanlı, ictimaiyyət nümayəndələri və kənd sakinləri iştirak edib. Ziyarət iştirakçıları şəhidlərimizin əziz xatirəsini ehtiramla anaraq, məzar ziyarətlərində olub.
Şəhid Yoldaşov Alim Mirzə oğlu 08 mart 1997-ci ildə rayonun Nəsimi kəndində anadan olub. Vətən müharibəsinə könüllü qoşulan Alim Füzuli istiqamıtində düşmən hücumunun qarşısını alarkən qəhrəmancasına şəhid olub. Alim Yoldaşov ölümündən sonra "Vətən uğrunda", "Füzulinin azad olunmasına görə" və "Cəsur döyüşçü" medalları ilə təltif edilmişdir.Vətən Müharibəsi şəhidi Qədirli İsmayıl Elçin oğlu da Vətən müharibəsinə könüllü olaraq qoşulub. O, əvvəlcə Cəbrayıl uğrunda gedən döyüşlərdə, sonra isə Qubadlı, Füzuli, Hadrut və Xocavənd uğrunda gedən döyüşlərdə fəal iştirak edir. Xocavəndin Qırmızı Bazar qəsəbəsi yaxınlığında gedən döyüşdə qəhrəmancasına şəhid olub.
Azərbaycan Prezidenti İlham Əliyevin Sərəncamları ilə Qədirli İsmayıl "Vətən uğrunda", "Cəbrayılın azad olunmasına görə" və "Füzulinin azad olunmasına görə" medalları ilə təltif edilmişdir.Allah şəhidlərimizə rəhmət eləsin!
