Azərbaycan və Qazaxıstan: Qardaşlıq, etimad və strateji tərəfdaşlıq nümunəsi
Azərbaycan və Qazaxıstan: Qardaşlıq, etimad və strateji tərəfdaşlıq nümunəsi
Azərbaycan beynəlxalq arenada etibarlı tərəfdaş kimi mövqeyini daha da möhkəmləndirərək, Mərkəzi və Orta Asiya regionu ölkələri ilə, xüsusilə də Qazaxıstanla münasibətlərini strateji müstəviyə yüksəldib. İki ölkə arasında çoxəsrlik dostluq, qarşılıqlı etimad və ortaq maraqlar üzərində qurulan əməkdaşlıq bu gün yeni mərhələyə qədəm qoyub.
Mərkəzi və Orta Asiya ölkələri ilə siyasi və iqtisadi əlaqələrin güclənməsi ölkəmizin xarici siyasət strategiyasının mühüm istiqamətlərindən biridir. Xalqlarımızı birləşdirən ortaq dil, din, mədəniyyət, mənəvi dəyərlər və tarixi köklər bu münasibətlərin inkişafına mühüm təsir göstərir.
Azərbaycanın Qazaxıstanla münasibətləri Mərkəzi Asiya dövlətləri ilə əməkdaşlıqda xüsusi yer tutur. İki ölkə arasında imzalanan çoxsaylı sənədlər, qarşılıqlı səfərlər və həyata keçirilən birgə layihələr strateji tərəfdaşlıq əlaqələrinin möhkəmlənməsinə xidmət edir.
Bu münasibətlər yalnız iqtisadi sahə ilə məhdudlaşmır, həm də siyasi etimad, qarşılıqlı hörmət və ortaq maraqlar üzərində formalaşmış dərin müttəfiqlik əlaqələrini əks etdirir. Azərbaycan və Qazaxıstan çoxəsrlik dostluq ənənələrini qoruyub saxlamaqla yanaşı, onları yeni dövrün reallıqlarına uyğun şəkildə inkişaf etdirə biliblər.
Azərbaycan və Qazaxıstan nümayəndələri bir çox beynəlxalq və regional təşkilatlarda – o cümlədən BMT, Türk Dövlətləri Təşkilatı, İslam Əməkdaşlıq Təşkilatı və digər qurumlarda — fəal əməkdaşlıq edir və bir-birini dəstəkləyir.
Bu, iki ölkənin ortaq maraqlara və birliyə əsaslanan siyasətinin təzahürüdür. Qazaxıstanın Azərbaycanın işğaldan azad edilmiş ərazilərində bərpa və yenidənqurma işlərində iştirakı isə bu dostluğun ən bariz nümunələrindən biridir.
Bu təşəbbüslər Qazaxıstanın Azərbaycanla həmrəyliyini, iki qardaş xalqın sarsılmaz birliyini bir daha nümayiş etdirir.Azərbaycan–Qazaxıstan münasibətlərinin təməlində dövlət başçıları səviyyəsində formalaşmış səmimi münasibətlər və siyasi etimad dayanır. Prezident İlham Əliyev və Prezident Kasım-Jomart Tokayevin rəhbərliyi ilə son illərdə əlaqələr daha da genişlənib, əməkdaşlığın yeni istiqamətləri müəyyən edilib.
Son üç ildə baş tutan qarşılıqlı səfərlərin intensivliyi, yüksək səviyyəli danışıqlar və strateji məsələlərin müzakirəsi bu münasibətlərin dərin məzmununu və praktiki səmərəsini nümayiş etdirir. Prezident İlham Əliyevin 18 oktyabr 2025-ci ildə “Kazinform” agentliyinə verdiyi müsahibə bu istiqamətdə görülən işlərin miqyasını və gələcəyə yönəlik vizionu bir daha ortaya qoydu.
Azərbaycan–Qazaxıstan əlaqələri bu gün regional sabitliyə, iqtisadi inkişafa və Türk dünyasının birliyinə xidmət edən strateji tərəfdaşlıq nümunəsinə çevrilib. İki qardaş xalqın ortaq iradəsi və dövlət başçılarının uzaqgörən siyasəti sayəsində Azərbaycan–Qazaxıstan münasibətləri gələcəyə doğru inamla irəliləyir.
Ziya Qurbanlı,
Biləsuvar Rayon İcra Hakimiyyətinin əməkdaşı