Əsgərabad bələdiyyəsi: məqsədimiz səmərəlilik və etimadı möhkəmləndirməkdir

Ölkəmizdə həyata keçirilən genişmiqyaslı islahatlar çərçivəsində yerli özünüidarəetmə orqanlarının — bələdiyyələrin rolu getdikcə artır. Son seçkilər və inzibati-ərazi islahatları nəticəsində bələdiyyələrin birləşdirilməsi, onların idarəetmə və maliyyə imkanlarının genişləndirilməsi yerli səviyyədə problemlərin daha operativ və məqsədyönlü həllinə şərait yaradıb.

Biləsuvar rayonunda aparılan bu islahatlar nəticəsində bələdiyyələrin sayı 23-dən 11-ə endirilib. Hazırda Əsgərabad bələdiyyəsi dörd kəndin sakinlərinə xidmət göstərir.

Əsgərabad bələdiyyəsinin sədri Hacı Miralim Mirsultanov “Bilesuvarinfo”ya müsahibəsində rəhbərlik etdiyi qurumun yeni fəaliyyət istiqamətləri və qarşıya qoyulan məqsədlər barədə fikirlərini bölüşüb:

- Yeni mərhələdə əsas məqsədimiz bələdiyyənin fəaliyyətində səmərəliliyin yüksəldilməsi, sakinlərlə əlaqələrin gücləndirilməsi və yerli inkişaf təşəbbüslərinin dəstəklənməsidir.
Azərbaycan Respublikasında həyata keçirilən islahatlar yerli özünüidarəetmə institutunun inkişafına və bələdiyyələrin fəaliyyətinin mükəmməlləşdirilməsinə yönəlib.
Bələdiyyələr dövlətlə xalq arasında körpü rolunu oynayan, yerli problemlərin həllində, vətəndaşların sosial rifahının yüksəldilməsində və ictimai iştirakçılığın təmin edilməsində mühüm təsisatdır. Onların əsas məqsədi — dövlətin sosial-iqtisadi siyasətini yerli səviyyədə həyata keçirmək, vətəndaşların ehtiyac və təkliflərini nəzərə almaq, kənd və qəsəbələrin inkişafını təmin etməkdir.
Son illərdə dövlət tərəfindən bələdiyyələrin fəaliyyətinə göstərilən dəstək, bu sahədə normativ-hüquqi bazanın təkmilləşdirilməsi və yerli büdcə gəlirlərinin artırılması üçün yaradılan imkanlar bələdiyyələrin real təsir gücünü artırır. Cənab Prezidentin rəhbərliyi ilə həyata keçirilən yerli idarəetmədə şəffaflıq və innovativ yanaşmalar siyasəti, qarşıdakı illərdə bələdiyyələrin inkişafına daha geniş imkanlar açacaq. Dövlət Başçısı qeyd edib: “Bələdiyyələr xalqın seçdiyi, xalq üçün çalışan, yerli səviyyədə problemlərin həllinə töhfə verən idarəetmə orqanları olmalıdır.” Bu çağırış hər bir bələdiyyə üzvü üçün fəaliyyət proqramının əsasını təşkil edir.
Azərbaycanda bələdiyyələrin formalaşması müstəqillik dövrünün ən mühüm demokratik nailiyyətlərindəndir. Son illərdə aparılan inzibati-ərazi islahatları, bələdiyyələrin birləşdirilməsi və daha güclü yerli idarəetmə sisteminin yaradılması bu sahədə mühüm dönüş nöqtəsi olub.
Biləsuvar rayonunda da keçirilən son seçkilərdən sonra bələdiyyələrin sayının azaldılması idarəetmədə çevikliyi və resursların daha səmərəli istifadəsini təmin etməyə yönəlib. Hazırda Əsgərabad bələdiyyəsi Aşağı Cürəli, Yuxarı Cürəli, Muğankənd və Əsgərabad kəndlərini əhatə etməklə, on minə yaxın əhaliyə xidmət göstərir.

Seçkilərdən sonra keçirilən görüş və müzakirələrdə sakinlərin rəy və təklifləri diqqətlə dinlənilib, kəndlərin inkişaf istiqamətləri müəyyənləşdirilib. Bələdiyyənin balansında olan torpaqlardan səmərəli istifadə, bələdiyyə vergilərinin toplanması və büdcə imkanlarının artırılması hesabına əldə olunan gəlirlər kəndlərin sosial-iqtisadi inkişafına yönəldilir. Hazırda kənd yollarının təmiri və yeni yolların tikintisi, küçə işıqlandırma sistemlərinin bərpası və genişləndirilməsi istiqamətində işlər sürətlə davam etdirilir.


Gələcək planlar arasında — gənclərin asudə vaxtının səmərəli təşkili, istirahət parklarının salınması, yaşıllıq zolaqlarının genişləndirilməsi və ətraf mühitin mühafizəsi tədbirlərinin gücləndirilməsi də var.

Əsgərabad bələdiyyəsi olaraq əsas məqsədimiz — sakinlərin bələdiyyəyə olan inamını möhkəmləndirmək, onların hər bir təklifini real layihəyə çevirmək, vətəndaş–məmur münasibətlərində qarşılıqlı etimad və şəffaflıq mühitini gücləndirməkdir.

Biz inanırıq ki, dövlətin dəstəyi, sakinlərin birliyi və bələdiyyənin məsuliyyətli fəaliyyəti nəticəsində Əsgərabad, Muğankənd, Aşağı və Yuxarı Cürəli kəndləri yaxın illərdə daha abad, daha işıqlı və daha yaşıl yaşayış məntəqələrinə çevriləcək.